حوليات ...رحاب صالح: دموع

حوليات ...رحاب صالح: دموع

عيب لما يبقى راجل كبير وشايب ويبكي...!!1

!كـتير قوى اتقالت لي الجملة دي لأني كـتير احتجت للبكا وكتير احتجب

ولما بتغيّم فجأة (يا سلام على غيوم السما في لحظة انتشاء غير عادية

وآآآآه من العيون لما بتتقّل بدموع مجهولة المصدر) ومن غير سبب

باشعر باحتياج شديد للبكا وبتيجي زي ما بتيجي ...1

يعني لما بكيت أثناء وبطول فيلم "رومانتيكا"تكاثرت الأسئلة وازداد
الإستنكار مِن كل مَن هم حولي .. لما ؟؟؟وكيف؟؟؟؟

كيف تبكي وانت كبير

وازاي تتأثر بحاجة أساساً ما لهاش تأثير

كانت جوايا ردود وكلام وشجون وأحلام عايز أقولها للي معايا

لكن البرود اللي في مشاعره. .. والجمود اللي في عنيه

كانوا دايماحواجز بتقفلني أنا شخصياً

وأفضل مقفول فترة من الزمن تطـــول وتقصرعلى حسب عوامل الطبيعة

وتقلبات الزمن وتقليباته فيّ على الجانبين

وأحاول أكون حد تاني

وما أقدرش أبدا

أفشل في خلق جديد لتكوين متراكم من طفولة مليئة بالحواديت الداخلية

والأحلام العريضة والأحاسيس التي كنت أتيه بها فخرا وأكتفي بها ذخراً

لمستقبل فاتح لي أحضانه لأفاجأ أنه فاتح لي كل شئ

إلاّ حكاية الحضن دية ولما ما ألاقيش أترمي في حضن كلمتين دمّعت وأنا بكتبهم وأفضل أبكي

ولما البنت اللي حبتني عشان (على حد قولها) أحاسيسي

ما وجدتش مني قبول لتوجيهاتها في طريقة لبسي( الكلاسيك) اللي محتاج (يتروشن)

رمتلي رسالة عبر الإميل بتقول أنها صلت صلاة استخارة واكتشفت ان احنا ما ننفعش لبعض برضه بكيت ..؟1

أكيد طبعا مش عليها ...لكن على اللحظة الي خسرت فيها رهاني على إن اللي جوّاني هو اللي يكسب ...1

بكيت على قلوبنا وأرواحنا اللي بنديّهم للي برّاني ... يمكن عشان مستورد ؟؟؟!!

ولما صديق يستعين بي لقضاء حاجة ملمّة وأأدّيهاله وأريّح باله ويديني ضهره تماما ومباشرة بعد أداء
الخدمة اقتداءاً بالحكومة المصرية... برضه بابكي

ياااااااااه

معقولة قدرت أكـتب الكام سطر اللي فاتوامن غير ما حد يقاطعني

أو نفسي تتقفل بالقفل المصدّي

وهل ممكن أكمّل مرة تانية؟

يمكن